රුසියානු තෙල් මිලදී ගැනීම් නතර කරන ලෙස ට්‍රම්ප්ගෙන් නේටෝ ජාතීන්ට බලපෑම්
September 14, 2025 06:49 am
රුසියානු ඉන්ධන මිලදී ගැනීම නවත්වන ලෙසත් යුක්‍රේන - රුසියා යුද්ධය අවසන් කිරීම සඳහා රුසියාවට ප්‍රධාන සම්බාධක පනවන ලෙසත් ඉල්ලා අමෙරිකානු ජනාධිපති ඩොනල්ඩ් ට්‍රම්ප් විසින් නේටෝ ජාතීන්ට බලපෑම් කර ඇතැයි විදෙස් මාධ්‍ය වාර්තා කර තිබේ.
සියලුම නේටෝ රටවල් එකඟ වී එකම දේ සිදු කිරීමට ආරම්භ කළ විට සහ සියලුම නේටෝ රටවල් රුසියාවෙන් තෙල් මිලදී ගැනීම නැවැත්වූ විට තමන් රුසියාවට එරෙහිව ප්‍රධාන සම්බාධක පැනවීමට සූදානම් බව අමෙරිකානු ජනාධිපතිවරයා පවසා ඇතැයිද විදෙස් මාධ්‍ය වාර්තා කර ඇත.
මේ අතර නේටෝ සංවිධානය විසින් චීනයට 50% සිට 100%ක තීරු බදු පැනවිය යුතු බවත් ඩොනල්ඩ් ට්‍රම්ප් විසින් යෝජනා කර ඇතැයිද වාර්තා වේ.
යුක්‍රේන යුද්ධය අවසන් කිරීමට කිසිදු ප්‍රගතියක් ලබා නොගතහොත් මොස්කව් වෙත සම්බාධක පනවන බවට සහ එහි තෙල් මිලදී ගන්නා ප්‍රධාන ගැනුම්කරුවන් වන චීනය සහ ඉන්දියාව වැනි රටවලට ද්විතීයික සම්බාධක පනවන බවට ට්‍රම්ප් විසින් මීට පෙර ද තර්ජනය කර තිබුණි.
මෙහි එක් පියවරක් ලෙස රුසියානු තෙල් අඛණ්ඩව ආනයනය කිරීම හේතුවෙන් ඉන්දීය භාණ්ඩ සඳහා අතිරේක 25%ක තීරුබදු පැනවීමට අමෙරිකානු ජනාධිපතිවරයා කටයුතු කළේය.
