ව්‍යාජ NVQ සහතිකපත් ලබාදුන් ආයතනයක් අත්හිටුවයි
November 3, 2025 06:24 pm
ගෘහාශ්‍රිත විදේශ රැකියා සඳහා අවශ්‍ය NVQ සහතික ව්‍යාජ ලෙස නිර්මාණය කළ මාවනැල්ල NS Lanka පුහුණු ආයතනය තාවකාලිකව තහනම් කිරීමට ශ්‍රී ලංකා විදේශ සේවා නියුක්ති කාර්යාංශය පියවර ගෙන ඇත.
කාර්යාංශය විසින් විදේශ රැකියා පුහුණුව බාහිර ආයතන මගින් සිදුකර ගැනීම සඳහා සුදුසු පුහුණු ආයතන වෙත අනුමැතිය ලබාදෙන අතර ඒ සඳහා තෘතීක අධ්‍යාපන කොමිෂන් සභාවේ (TVC) අනුමැතිය ලබාගත යුතුවිය.
ඒ අනුව ඉහත ආයතනය මහනුවර ප්‍රදේශයේ ආරම්භ කර තිබෙන අතර එමගින් ගෘහස්ථ ගෘහපාලන සහායිකා තනතුර සඳහා අවශ්‍ය පුහුණු පාඨමාලා මෙහෙයවන බවට සහතික වී තිබේ.
එහෙත් ඔවුන් අදාළ කොන්දේසි කඩකරමින් ව්‍යාජ සහතික සකසා පුද්ගලයින්ට අලෙවිකර තිබේ.
මේ අතර, මෙම වසරේ පෙබරවාරි 05 දින සිට ඔවුන් මාවනැල්ල ප්‍රදේශයේද පුහුණු පාඨමාලාවන් ආරම්භ කර ඇති නමුත් මාවනැල්ල ශාඛාවට තෘතීක අධ්‍යාපන කොමිෂන් සභාවේ (TVC) අනුමැතිය ලබා ගෙන නොමැත.
ගෘහස්ථ ගෘහපාලන සහායිකා තනතුර සඳහා අවශ්‍ය NVQ සහතික ව්‍යාජ ලෙස නිර්මාණය කර පුහුණු ලාභීන් සඳහා ලබාදෙන බවට තොරතුරු අනාවරණය වී ඇත.
ඒ අනුව සිදුකළ විමර්ශනයේ දී NS Lanka පුහුණු ආයතනය තාවකාලිකව අත්හිටුවීමට පියවර ගෙන ඇති අතර ඊට අදාළ ඉදිරි විමර්ශන කටයුතු කාර්යාංශයේ අභ්‍යන්තර විගණන අංශය විසින් මෙහෙයවමින් පවතී.
