පසුගිය වසරේ තෙරපීමෙන් මියගිය ක්රීඩා ලෝලීන්ට IPL උපහාරය
March 29, 2026 01:21 pm
ලොව ධනවත්ම ක්රිකට් ලීගය වන ඉන්දියන් ප්රිමියර් ලිග් ක්රිකට් තරගාවලියේ 19 වන තරගවාරය ඊයේ (28) ආරම්භ විය.
පසුගිය වසරේදී රෝයල් චැලෙන්ජර්ස් බැංගලූරු කණ්ඩායම ශූරයන් වූ අවස්ථාවේ පැවති ජයග්රාහි සැමරුම් උත්සවයේදී තෙරපීමෙන් මියගිය ක්රීඩාලෝලීන් 11 දෙනාට උපහාර පිණිස මෙවර තරගාවලිය ආරම්භ වුයේ සමාරම්භක උත්සවයකින් තොරවය.
සමාරම්භක උත්සවය වෙනුවට, මෙවර තරගවාරය ආරම්භයේදී මියගිය අය සිහිකරමින් විනාඩියක නිශ්ශබ්දතාවක් පැවැති අතර එම ක්රීඩාලෝලීන් 11 දෙනා වෙනුවෙන් චින්නසාමි ක්රීඩාංගණයේ ආසන 11ක් වෙන්කර තැබීමටද පියවර ගැනිණ.
තරගය සඳහා කණ්ඩායම් දෙකම එක්වුණේ කළුපටි පළඳිමින්ය.
2026, ඉන්දීය ප්රිමියර් ලීග් තරගාවලියේ සන්රයිසස් හයිද්රභාත් කණ්ඩායම සමඟ පැවැති තරගය කඩුලු 06කින් ජයගැනීමට රෝයල් චැලෙන්ජර්ස් බැංගලූරු කණ්ඩායම සමත්විය.
තරගයේ කාසියේ වාසිය දිනූ බැංගලූරු කණ්ඩායමේ ආරාධනාවෙන් ප්රථමයෙන් පන්දුවට පහර දුන් හයිද්රභාත් කණ්ඩායම නියමිත පන්දුවාර 20 තුළ කඩුලු 09ක් දැවී රැස්කරගත් ලකුණු සංඛ්යාව 201කි.
එහිදී නායක ඉෂාන් කිෂන් ලකුණු 80ක් සහ අනික්ට් වර්මා ලකුණු 43ක් රැස්කරගත්තහ.
පන්දුයැවීමේදී ජෙකොබ් ඩුෆි සහ රොමාරියෝ ශෙෆර්ඩ් කඩුලු 03 බැගින් දවා ගත්තහ.
ජයග්රහණය සඳහා ලකුණු 202ක ඉලක්කයක් හඹා යාමට පිටියට පිවිසි රෝයල් චැලෙන්ජර්ස් බැංගලූරු කණ්ඩායම පන්දුවාර 15.4ක් තුළ කඩුලු 04ක් පමණක් දැවී තරගයේ ජය වාර්තා කළහ.
එහිදී විරාත් කෝලි ලකුණු 69ක් සහ දේව්ඩුට් පඩික්කල් ලකුණු 61ක් රැස්කරගැනීමට සමත්විය.
පන්දුයැවීමේදී ඩේවිට් පයින් කඩුලු 02ක් බිඳහෙළුවේය.
සන්රයිසස් හයිද්රභාත් කණ්ඩායම නියෝජන කරමින් ක්රීඩා කළ එෂාන් මාලිංග පන්දුවාර දෙකක් තුළ ලකුණු 35ක් ප්රතිවාදීන්ට ප්රදානය කළේය.
මෙම තරගය පැවැත්වුණේ, බැංගලෝරයේ චින්නසාමි ක්රිකට් ක්රීඩාංගණයේදීය.
