වැව් සංවර්ධනය කළ බව පවසමින් වසර කිහිපයකට පෙර සිදු වූ කෝටි 60ක වංචාවක්

පසුගිය පොදුපෙරමුණ පාලන සමයේ උතුරු මැද පළාතේ වැව් සංවර්ධනය කළ බව පවසමින් උතුරු මැද පළාත් සංවර්ධන නිර්මාණ හා යන්ත්‍රෝපකරණ ඒජන්සිය තුළ රුපියල් කෝටි ගණනක වංචාක් සිදුකර ඇති බව කියැවෙන සිද්ධිය සම්බන්ධයෙන් විධිමත් විමර්ශනයක් සිදුකොට එකී විමර්ශනවල ප්‍රගති වාර්තාවක් අධිකරණය හමුවට ඉදිරිපත් කරන ලෙස අනුරාධපුර ප්‍රධාන මහෙස්ත්‍රාත්වරයා අපරාධ පරීක්ෂණ දෙපාර්තමේන්තුවට නියෝග කර තිබේ.

අනුරාධපුර ප්‍රධාන මහෙස්ත්‍රාත්වරයා සියපත් සසිදු වික්‍රමරත්න මහතා මෙසේ නියෝග කළේ උතුරු මැද පළාත් සංවර්ධන නිර්මාණ හා යන්ත්‍රෝපකරණ ඒජන්සිය තුළ සිදුව ඇති බව කියන මෙම මහපරිමාණ මුල්‍ය වංචාව සම්බන්ධයෙන් බී වාර්තාවක් මගින් අපරාධ පරීක්ෂණ දෙපාර්තමේන්තුව අධිකරණයට කළ කරුණු දැක්වීමක් සැලකිල්ලට ගනිමිනි. 

ඒ අනුව, මෙම සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව තවදුරටත් අධිකරණයට කරුණු දක්වමින් ප්‍රකාශ කර ඇත්තේ, උතුරු මැද පළාතේ වැව් සංවර්ධනය කළ බව පවසමින් මීට වසර ගණනාවකට පෙර අදාළ ඒජන්සිය රුපියල් කෝටි 60 කට අධික මුදලක් වංචා කර ඇති බවට එම ඒජන්සියේම වත්මන් සභාපතිවරයා අපරාධ පරීක්ෂණ දෙපාර්තමේන්තුවට පැමිණිලි කර ඇති බවය.

උතුරු පළාතේ වැව් සංවර්ධනය කළ බව පවසා අදාළ මහ පරිමාණ මුදල වංචා කර ඇති බවත් සංවර්ධනය කළ බව කියන කිසිදු වැවක් සොයාගැනීමට නොහැකි වී ඇති බවත් එම ඒජන්සියේ වත්මන් සභාපතිවරයා සිය පැමිණිල්ල මගින් ප්‍රකාශ කොට ඇති බවද, අපරාධ පරීක්ෂණ දෙපාර්තමේන්තුව අධිකරණයට දැනුම් දී තිබේ.

ඒ අනුව, මෙම මහපරිමාණ මුල්‍ය වංචාව සම්බන්ධයෙන් සංකීර්ණවූත්, පුළුල්වූත් විමර්ශනයක් සිදුකළ යුතු බවත් එම විමර්ශනවලට අදාළ මූලික කටයුතු දැනටමත් අරම්භ කර ඇති බවත් අපරාධ පරීක්ෂණ දෙපාර්තමේන්තුව අධිකරණයට වැඩිදුරටත් පවසා ඇත.

එමෙන්ම මෙම මුල්‍ය වංචාව සම්බන්ධයෙන් අරඹා ඇති විමර්ශන තවදුරටත් ඉදිරියට සිදුකර එහි ප්‍රගතිය අධිකරණයට දැනුම්දීමට අධිකරණයේ අවසරය සිය දෙපාර්තමේන්තුවට ලබාදෙන ලෙසද අධිකරණයෙන් අයැද සිටි අපරාධ පරීක්ෂණ දෙපාර්තමේන්තුව මෙම මහපරිමාණ මුල්‍ය වංචාවට සම්බන්ධ බවට සැක කෙරෙන රජයේ නිලධාරීන් හෝ තවත් පාර්ශව සිටී නම් ඔවුන් අත්අඩංගුවට ගෙන අධිකරණයට ඉදිරිපත් කිරීමට අවැසි නීතිමය පියවර ගන්නා බවද අධිකරණයට දැනුම් දී තිබේ.