හෝමූස් අරින්න ඉරානය බෑ කියයි

අමෙරිකා එක්සත් ජනපදය සහ ඊශ්‍රායලය විසින් සටන් විරාමය උල්ලංඝනය කිරීම හේතුවෙන් හෝමූස් සමුද්‍ර සන්ධිය විවෘත කළ නොහැකි බව ඉරානය පවසා තිබේ.

අමෙරිකාව විසින් ඉරාන වරායන් අවහිර කිරීම ගෝලීය ආර්ථිකය ප්‍රාණ ඇපයට ගැනීමක් ලෙස ද ඉරාන පාර්ලිමේන්තුවේ කථානායකවරයා සඳහන් කර ඇත.

කෙසේවෙතත් ඉරාන ජනාධිපති මසූඩ් පෙසෙෂ්කියන් සඳහන් කර ඇත්තේ,  ඉරානය සාම සාකච්ඡා සඳහා විවෘතව පැවතින බවත්, ඒ සඳහා කැපවීම් කඩකිරීම, අවහිර කිරීම් සහ තර්ජනය කිරීම් සැබෑ සාකච්ඡාවක් සඳහා ප්‍රධාන බාධක වනු ඇති බවය.

මෙවන් පසුබිමක ඉරානය සමඟ නව වටයක සාම සාකච්ඡා ඉදිරි පැය 36 සිට 72 දක්වා කාලය ඇතුළත ආරම්භ වීමට ඉඩ ඇති බව අමෙරිකානු ජනාධිපති ඩොනල්ඩ් ට්‍රම්ප් ප්‍රකාශ කර තිබුණි.

රාජ්‍ය තාන්ත්‍රික ප්‍රයත්නයන් සඳහා අවස්ථාව ලබා දෙමින් ඉරානය සමඟ පවතින සටන් විරාමය දීර්ඝ කිරීමට ජනාධිපතිවරයා තීරණය කිරීමෙන් පසු මෙම නිවේදනය නිකුත්කර තිබීම සුවිශේෂීය.

'නිව් යෝර්ක් පෝස්ට්' පුවත්පත වාර්තා කරන පරිදි, පාකිස්තානය මැදිහත් වී සිදුකරන සාම සාකච්ඡා සාර්ථක මාවතකට අවතීර්ණ වී ඇති අතර, ඒ පිළිබඳව අදහස් දක්වමින් ජනාධිපති ට්‍රම්ප් පවසා ඇත්තේ "එය සිදුවීමට ඉඩ ඇති" බවය.

ඊයේ (22) දින අවසන් වීමට තිබූ සටන් විරාමය පාකිස්තානයේ ඉල්ලීම පරිදි දීර්ඝ කිරීමට ජනාධිපති ට්‍රම්ප් කටයුතු කළේය.