දිට්වා සහන පැකේජය කඩිනම් කිරීමට ඉන්දියාව සහ ශ්රී ලංකාව එකඟ වෙයි
May 10, 2026 10:25 pm
පසුගිය වසරේ ශ්රී ලංකාවට බලපෑ දරුණුතම ස්වභාවික ව්යසනයෙන් පසු ප්රතිසංස්කරණ කටයුතු සඳහා ඉන්දියාව විසින් ලබාදුන් අමෙරිකානු ඩොලර් මිලියන 450ක සහන පැකේජය ක්රියාත්මක කිරීම කඩිනම් කිරීමට දෙරට එකඟ වී තිබේ.
කොළඹ ඉන්දීය මහ කොමසාරිස් සන්තෝෂ් ජා මහතා සහ කම්කරු අමාත්ය මෙන්ම මුදල් හා සැලසුම් නියෝජ්ය අමාත්ය අනිල් ජයන්ත ප්රනාන්දු මහතා අතර පැවති හමුවකදී මේ පිළිබඳව සාකච්ඡා කෙරිණි.
"ඩොලර් මිලියන 450ක පශ්චාත් දිට්වා ප්රතිසංස්කරණ පැකේජය ක්රියාත්මක කිරීම කඩිනම් කිරීමට එකඟ වූ බව" මහ කොමසාරිස් ජා මහතා X පණිවිඩයක් නිකුත් කරමින් සඳහන් කළේය.
පසුගිය වසරේ නොවැම්බර් 27 වන දින ශ්රී ලංකාවට බලපෑ ‘දිට්වා’ සුළි කුණාටුව හේතුවෙන් මිලියන තුනකට අධික ජනතාවක් පීඩාවට පත් වූ අතර පුද්ගල මරණ 640කට අධික සංඛ්යාවක් වාර්තා විය.
එහිදී ශ්රී ලංකාවට සහාය වූ පළමු රට ලෙස ඉන්දියාව නොවැම්බර් 28 වන දින සහන සේවා සඳහා ‘සාගර් බන්දු’ මෙහෙයුම දියත් කළේය.
දෙසැම්බර් 23 වන දින ඉන්දීය විදේශ කටයුතු අමාත්ය එස්. ජයශංකර් මහතා ශ්රී ලංකාවේ සංචාරයක නිරත වෙමින් මෙම ඩොලර් මිලියන 450ක ප්රතිසංස්කරණ පැකේජය ප්රකාශයට පත් කළේය.
අමෙරිකානු ඩොලර් මිලියන 350ක සහනදායී ණය පහසුකම්.
අමෙරිකානු ඩොලර් මිලියන 100ක ප්රදානයන්.
මෙම හමුවේදී දැනට ක්රියාත්මක අනෙකුත් ද්විපාර්ශ්වික ව්යාපෘතිවල ප්රගතිය පිළිබඳවද අවධානය යොමු කර ඇත.
නිවාස, සෞඛ්ය, ජලය, යටිතල පහසුකම් සහ තාක්ෂණික ක්ෂේත්රයන්හි ඉන්දීය ව්යාපෘති රැසක් දැනටමත් ශ්රී ලංකාවේ ක්රියාත්මක වේ.
මීට අමතරව, නවීන මූල්ය රාමු සහ සයිබර් ආරක්ෂණ ක්ෂේත්රයන්හි සහයෝගීතාව පිළිබඳවද මෙහිදී අදහස් හුවමාරු කරගත් බව මහ කොමසාරිස්වරයා වැඩිදුරටත් පැවසීය.
