සෝමාවතිය රක්ෂිතයේ වළදමා තිබූ T-56 ගිනිඅවියක් පොලිස් භාරයට

සෝමාවතිය ජාතික රක්ෂිතය තුළ ගසක් මුල වළදමා තිබූ T-56 වර්ගයේ ගිනිඅවියක් සොයාගැනීමට කොළඹ අපරාධ කොට්ඨාසය (CCD) සමත්ව තිබේ.

එම කොට්ඨාසයේ විමර්ශන ඒකක 5හි නිලධාරීන් කණ්ඩායමක් අද (24) දිනයේ සිදුකළ විශේෂ මෙහෙයුමකදී මෙම ගිනිඅවිය සොයාගෙන ඇත. 

පෞද්ගලික තොරතුරුකරුවෙකුගෙන් පොලිසියට ලැබුණු රහසිගත තොරතුරක් මත මෙම වැටලීම ක්‍රියාත්මක කර තිබේ.

කෙසේ නමුත් මෙම ගිනිඅවියේ නිශ්චිත අයිතිකරු කවුරුන්ද යන්න මෙතෙක් අනාවරණය වී නොමැත.

පොලිසිය සැක කරන්නේ මෙය පසුගියදා වැලිකන්ද ප්‍රදේශයේදී පොලිස් නිලධාරීන්ට තියුණු ආයුධයකින් පහරදීමට තැත්කළ අවස්ථාවේ, පොලිස් වෙඩි පහරින් මියගිය පුද්ගලයාට මෙය අයත්ව තිබෙන්නට ඇති බවය.

සිද්ධිය සම්බන්ධයෙන් කොළඹ අපරාධ කොට්ඨාසය වැඩිදුර විමර්ශන සිදුකරයි.