රජයේ විශ්රාම වැටුප් නැති අයටත් විශ්රාම වැටුප් ගන්න පුළුවන් ක්රමය මෙන්න
May 25, 2026 03:52 pm
වයස අවුරුදු 18ත් 59ත් අතර පසුවන රජයේ විශ්රාම වැටුප් හිමිකම් නොලබන පුද්ගලයින් සඳහා සුරැකුම විශ්රාම වැටුප් ක්රමය තවදුරටත් විවෘතව පවතින බව ශ්රී ලංකා සමාජ ආරක්ෂණ මණ්ඩලය පවසයි.
නිවේදනයක් නිකුත් කරමින් එම මණ්ඩලය සඳහන් කළේ, සාමාජිකයාගේ අවශ්යතාව සහ දායකමුදල් ගෙවීමේ හැකියාව මත තමන්ට රිසි විශ්රාම වැටුප් ප්රමාණයක් තීරණය කරගැනීමට හැකි බවය.
මෙම විශ්රාම සැලසුම් යටතේ සුවිශේෂි ප්රතිලාභ රැසක් හිමිවනු ඇත.
ඒ අනුව වයස අවුරුදු 60 සිට ජීවිතාන්තය දක්වා ගිවිසගත් රුපියල් 50,000ක මාසික විශ්රාම වැටුපක් හිමිවන බව ශ්රී ලංකා සමාජ ආරක්ෂණ මණ්ඩලය සඳහන් කරයි.
වාරික ගෙවීම අතපසු වුවද ගිණුමේ ශේෂයට ගැලපූ විශ්රාම වැටුපක් හිමි වේ.
විශ්රාමිකයෙකු ලෙස සිදුවන අභාවයකදී, කාලත්රයාට/ යැපෙන්නාට සමාජිකයාගේ වයස අවුරුදු 80 වන තෙක් විශ්රාම වැටුප අඛණ්ඩව හිමි වනු ඇති බව අදාළ නිවේදනයේ සඳහන්.
විශ්රාම වැටුප් ලැබීමට පෙර සිදු වන අභාවයකදී අවමංගල්ය වියදම් ආවරණයට රුපියල් 100,000ක් සමගින් කාලත්රයාට විශ්රාම වැටුප් හිමිකම හෝ ගෙවූ මුදල ආයෝජන ආදායම සමඟ ලබාගැනීමේ හැකියාව පවතී.
හදිසි අනතුරක හෝ රෝගයක ප්රතිඵලයක් ලෙස අබලතාවයට පත්වන සාමාජිකයින්ට රුපියල් 500,000ක පාරිතෝෂිකයක් සමඟ අබලතාවය ඇති වූ දා සිට ජීවිතාන්තය දක්වාම එකඟ වූ විශ්රාම වැටුප හිමිවේ.
එවැනි අවස්ථාවකදී සාමාජිකයා ඉදිරි වාරික ගෙවීමෙන් සම්පූර්ණයෙන්ම නිදහස් කරනු ලබයි.
ස්ථිර අර්ධ අබලතාවයකදී රුපියල් 100,000ක පාරිතෝෂිකයක් ලබා දෙන බව ද ශ්රී ලංකා සමාජ ආරක්ෂණ මණ්ඩලය ප්රකාශ කළේය. එමෙන්ම ප්රතිලාභියාගේ දරුවන්ගේ අධ්යාපනික කටයුතු හෝ ඕනෑම අවශ්යතාවක් සඳහා මූල්ය සහයක් ලබාගත හැකිය.
ඒ අනුව වයස අවුරුදු 18ත් 29ත් අතර කාලය තුළ මාසික, වාර්ෂිකව හෝ එකවර මුදලක් ලෙස අවශ්යතාවය පරිදි ප්රතිලාභ අයදුම් කළ හැකිය.
සුරැකුම විශ්රාම සැලසුම සඳහා වයස අවුරුදු 20 සිට 45 දක්වා කාලය තුළ මුදල් ගෙවීම සිදු කළ හැකි බව එම නිවේදනයේ වැඩිදුරටත් දැක්වේ.
මෙම වාරික ගෙවීම් අවස්ථාවන්ට අමතරව කාර්තුමය, වාර්ෂිකව සහ වසර දෙක සිට හතර දක්වා කෙටි කාලසීමාවන් තුළ නම්යශිලී ලෙස වාරික ගෙවීම් ක්රම තොරාගැනීමේ හැකියාව ද පවතිනි බව ශ්රී ලංකා සමාජ ආරක්ෂණ මණ්ඩලය වැඩිදුරටත් සඳහන් කරයි.
මේ සම්බන්ධයෙන් වැඩිදුර තොරතුරු 011 2 88 60 88 යන අංකයෙන් ද 077 1 44 30 44 යන වට්ස්ඇප් අංකය මගින් ද ලබාගත හැකිය.
