බ්රසීලයෙන් හයිටියට ප්රහාරයක් - තුර්කිය පැරගුවේ හමුවේ දණ නමයි
June 20, 2026 11:34 am
පාපන්දු ලෝක කුසලාන තරගාවලියේ මෙරට වේලාවෙන් අද (20) උදෑසන අවසන් වූ තියුණු තරග ද්විත්වයකින් විශිෂ්ට ජයග්රහණ වාර්තා කිරීමට ප්රබල බ්රසීලය සහ පැරගුවේ කණ්ඩායම් සමත් විය.
බ්රසීල සුපිරි ජයයෙන් හයිටිය ඉවතට?
'C' කාණ්ඩයේ තීරණාත්මක තරගයකින් ගෝල 3-0ක පහසු සහ ප්රබල ජයක් වාර්තා කිරීමට ලෝක ශ්රේණිගත කිරීම්වල 6වැනි ස්ථානයේ පසුවන බ්රසීලය සමත් විය.
මෙම පරාජයත් සමග හයිටි රාජ්යයට ලෝක කුසලාන සිහිනය අත්හැරීමට සිදුවනු ඇත.
අමෙරිකාවේ පිලඩෙල්ෆියා ක්රීඩාංගණයේදී ක්රීඩාලෝලීන් 67,594කගේ උපරිම ජයඝෝෂා මධ්යයේ මෙම තරගය පැවැත්විණි.
තරගයේ පළමු අර්ධයේදීම බ්රසීල ක්රීඩකයින් ගෝල 3ම වාර්තා කරමින් පෙරමුණ ගත්තේය.
කෙසේ වෙතත්, දෙවැනි අර්ධයේදී බ්රසීල රිද්මය පාලනය කිරීමට ලෝක ශ්රේණිගත කිරීම්හි 91වැනි ස්ථානයේ පසුවන හයිටි ආරක්ෂකයින් සමත් වුවද, ඔවුන්ට තරගය ජය ගැනීමට එය ප්රමාණවත් නොවීය.
මෙම සුපිරි ජයත් සමඟ බ්රසීලය අවසන් 32 දෙනාගේ වටයට (දෙවැනි වටය) සුදුසුකම් ලැබූ අතර, ක්රීඩා කළ තරග දෙකම පරාජය වූ හයිටිය තරගාවලියෙන් විසිවනු ඇත.
පැරගුවේ ප්රහාරයෙන් තුර්කියට අනපේක්ෂිත පරාජයක්
ලෝක පාපන්දු පිටියේ ප්රබලයෙකු වන තුර්කියට එරෙහිව ගෝල 1-0ක තියුණු ජයක් ලැබීමට දකුණු අමෙරිකානු පැරගුවේ කණ්ඩායම සමත් විය.
අමෙරිකාවේ සැන් ෆ්රැන්සිස්කෝ ක්රීඩාංගණයේදී ප්රේක්ෂකයින් 68,500කගේ සහභාගිත්වයෙන් තරගය පැවැත්විණි.
'D' කාණ්ඩයේ තරගයක් වූ මෙහි, ආරම්භක 2වැනි මිනිත්තුවේදීම ගෝලයක් වාර්තා කරමින් පැරගුවේ කණ්ඩායම පෙරමුණ ගත්තේය.
ඉන්පසුව සිය ආරක්ෂක වළල්ල දැඩි කළ ඔවුන්, තුර්කියට කිසිදු අවස්ථාවක තමන්ට අභියෝග කිරීමට ඉඩ නොදුන්නේය.
